مقالات
أخر الأخبار

وداعاً ابراهيم نصر ايقونة الضحك المصرية

من لحظات أعلن د.”أشرف زكي” نقيب المهن التمثيلية وفاة الفنان الكوميدي الكبير “إبراهيم نصر” رائد تقديم برامج الكاميرا الخفية فى مصر فى عمر 70 سنة تقريباً..

“إبراهيم” إتولد سنة ١٩٥٠ فى حي شبرا فى القاهرة، وأصول عيلته صعيدية من محافظة أسيوط.. ظهرت موهبته فى التقليد وهو عنده 10 سنين بس!.. إتخرج من كلية الآداب سنة 1972، وأول ظهور له على شاشة التليفزيون كانت من خلال مشاركته مع الإعلامية “أمانى ناشد” فى برنامج (عزيزي المشاهد)..

بعدها عمل “إبراهيم” بعض الأدوار فى أفلام كتير خلّت إسمه يبتدى يبقى معروف فى الوسط الفني بس نقطة إنطلاقه الحقيقية واللى أثبت من خلالها موهبته التمثيلية الجبارة كانت مع برنامج الكاميرا الخفية!..

الموضوع كله جه بالصدفة لما “إبراهيم” قابل بالصدفة أ.”عبدالمنعم غالي” المسئول عن القناة الثانية واللى كان لسه ماسك إدراتها جديد.. الإتنين إتقابلوا فى مبني الإذاعة والتليفزيون فى ماسبيرو وبعد السلامات والتحية.. أ.”عبدالمنعم” طلب من “إبراهيم” إنه يطلع معاه مكتبه فوق عشان يشرحله فكرة مجنونة جت فى باله.. طلع معاه.. شرح أ.”عبدالمنعم” لـ “إبراهيم” إزاى إن الناس محتاجة تشوف عمل كوميدي قصير يلتفوا حواليه ويتعرض على التليفزيون!.. “إبراهيم” اللى كان واضح إن الموضوع كان بيدور فى دماغه من قبلها رد وقال: (نعمل كاميرا خفية، بس ماتعملتش قبل كدا فى العالم بحاله).. بدون تفكير وافق رئيس القناة الثانية وأمر بتوفير عربية خاصة وكاميرا ومخرج مع “إبراهيم” وقال لهم إنزلوا إشتغلوا!.. وكانت البداية من برنامج (إنسي الدنيا) اللى قدر وفى خلال سنين بسيطة وبمختلف مسمياته بعد كده يبقي هو البرنامج الأكثر مشاهدة فى رمضان..

بعد نجاح الموسم الأول كان واضح إن فيه موهبة عظيمة وسكة جديدة هتشد الناس إسمها الكاميرا الخفية.. المنتج “طارق نور” لفت نظره النجاح ده وإتفق مع “إبراهيم” إنهم يعملوا عقد يقدموا من خلاله البرنامج ده لسنين طويلة.. وكان أول بنود الإتفاق هو التعاقد مع الكاتب “فداء الشندويلي” والمخرج “رائد لبيب” عشان يكونوا شركاء تجربة النجاح..

التجهيز للحلقات ورغم إن عرضها بيكون فى رمضان لكن الترتيبات والتفكير بياخدوا 9 شهور تقريباً كل سنة!.. بس “إبراهيم” بيقول إنهم كانوا بيعملوا ده بحب..

وقت إذاعة برنامج الكاميرا الخفية الأسرة المصرية كلها بتكون ملمومة حوالين التليفزيون عشان يخطفوا ضحكة حقيقية من القلب سببها “إبراهيم” وبرنامجه اللى إستمر 15 سنة متتالية كان فيهم أساس الضحك عند المصريين..

ومش بس الكاميرا الخفية لكن “إبراهيم نصر” كان ممثل تقيل فى موهبته اللى شوفناها فى أدوار سينمائية كتير زي “شمس الزناتي” مع الزعيم “عادل إمام”، و”إكس لارج” مع النجم “أحمد حلمي”، و”مستر كاراتيه” مع “أحمد زكي”.. ده غير المسرحيات والمسلسلات برضه..

ربنا يرحم الفنان “إبراهيم نصر” أيقونة البهجة، وصاحب توكيل الضحك اللى من القلب على مدى سنين كتير.

اظهر المزيد

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
الرجوع الى الصفحه الرئيسة
إغلاق