ارتجالات
أخر الأخبار

ماتريده الروح

-قمر طالع بالنهار يا اخواتي
-أنتي ياست أتلمي بقي عيب
-ياست أعمل اي ماهو متنيل مش معبرني!
-وهتفضلي كدا يا ورد؟!
-أعمل اي يا فريدة مش واخد باله مني أصلًا..كل الي بيعمله انه بيبص عليا أستفدت انا اي يا فريدة
-ماهو هتفضلي تحبيه بس!حب من طرف واحد يا ورد
-أغمل اي يا فريدة مش عايزه أرخص نفسي واروح أقوله وحرام عليا إني أكلمه
-طب وليه هتعلقي نفسك بيه يا ورد وهو مش شايفك
-حبيته يا فريدة غصب عني..معايا في الجامعة والباص والمعامل وكل حاجة هو موجود فيها
-طب حاولي تنسيه ومتفكريش فيه أحنا في أجازة اهوه يعني لا جامعة ولا باص وبطلي تخرجي وتروحي عند المكان الي شغال فيه
-حاضر حاضر
-أنا همشي يا ورد علشان ماما خدي بالك من نفسك
-سلام يافريدة

“أنا وفريدة صحاب هي أكبر مني بسنتين هي مش صحبتي لا دي امي..ورد بنت فريدة معروفة”

“الساعة 12 بليل”
-فريدة
-نعم يا اختي
-هو هيحصل حاجة لو كلمته؟!
-هيحصل حاجة لو هزقتك انا بقي يا ورد
-عيب يا فريدة دا مش أخلاقك
-يبقي تتلمي يا ورد علشان متزعليش بجد
-ماهي مشاعر بعد الساعة 12 دي مهينة أوي وعايزة أرتبط بقى
-حاضر نامي وهنرتبط الصبح أنا وانتي وماما وناهد وكلنا
-أنتي بتاخديني علي قد عقلي؟
-آه يا ورد ولو منمتيش هاجي أضربك!
-ماشي هنام سلام

“عارفين أحساس لما بتكونوا بتحبوا وتلاقوا نفسكم بتعملوا حاجات مش حاسين بيها؟..تلاقي قلبك هو الي بيحركك وعقلك نام تقريبا..بس بنكون معذورين..سكينة الحب بتكون سرقانا”

-إزيك ياسفيان أنا ورد معاك في الجامعة والباص والسكشن
-آه إزيك يا ورد عامله اي
-الحمد لله وأنت؟
-تمام..كنتي عايزه حاجة ولا اي؟
-هه ليه يعني؟
-أصلك يعني دخلتي كلمتيني ماسنجر وانتي حتي عمرك ما وقفتي مع ولد غريبة أنك الي تكلميني
-هه لا لا مفيش انا أسفة مكنش قصدي
-لا تعالي بس

“معرفش عملت كدا إزاي أنا طول عمري رافضة فكرة ان يبقي ليا علاقة بولد غير زوجي! آكي أتهبلت”

-فريدة؟
-بخاف لما تقولي فريدة كدا
-عملت مصيبة
-هو أنتي بيجي وراكي غير المصايب؟
-فريدة مش بهزر
-قولي في اي بجد خوفتيني
-أنا كلمت سفيان..وقبل ما تقول اي حاجة انا عارفة انه حرام وغلط وكدا رخصت نفسي بس بحبه وعملت كدا خلاص اعمل اي بقي
-ومفروض قولك اي يا ورد..وأنتي مقتنعة انه غلط اقولك اي تاني ها؟
-معرفش يا فريدة انا زعلانه من نفسي اوي
-طب خلاص ممكن متتكررش تاني؟
-حاضر مش هتتكرر
-اما نشوف

“بعد يومين”

-فريدة؟
-تاني تاني بتبدأي الشات بإسمي يبقي في مصيبة جديدة صح
-أنا بعيط
-ليه مالك يا ورد
-سفيان كان منزل لينك صراحة وبعت سؤال “انت مرتبط؟” قال آه
-وأنتي مستنيه اي مفيش ولاد الايام دي مش مرتبطة! إلا من رحم ربي
-أمال كان بيبص عليا ليه
-واحد مش محترم وبيبص عالبنات أنتي مالك
-طب أعمل اي
-ولا حاجة تتنيلي تعمليله بلوك وتنسيه بقى متحطيش نفسك في وهم!
-حاضر


-سفيان أنت مرتبط بجد ولا مجرد إجابة بتقولها علشان سؤال صراحة وخلاص
-ماكان ممكن اقول لا وخلاص بس أنا فعلا مرتبط وقريب هقولك أخبار حلوة
-اه ماشي
-مفيش مبروك ولا اي؟
-ليه
-مش بقولك هقولك اخبار حلوة قريب
-آه صح لما تبقي تقولها هقولك مبروك

“كنت عارفة إني بهين نفسي..بس حقيقي مكنش عندي عقل أفكر بيه..كنت مستنيه حاجة واحده تكذب كلامه”

-فريدة في مصيبة جديدة عملتها
-كلمتيه تاني صح؟
-آه وكمان قالي ان في أخبار جديدة حلوة قريب
-أنتي مهزقة يا ورد..انتي معندكيش دم هو ميعرفكيش حتي آه بيشوفك بس هو مبيفكرش فيكي حتي وهو مدخلش يكلمك ولا مرة! أنتي الي كلمتيه يا ورد ومترجعيش تندمي
-تمام يا فريدة سلام

“كنت عارفة ان كلامها صح بس أنا حالتي النفسيه حالًا متسمحش إني أتعاتب..كنت محتاجة حد يقولي إني صح إن دا مش حرام كنت محتاجة الي يطبلي بمعني أصح
تعبت جدًا ومبقتش أكلم فريدة ولا سفيان..ولا اي حد بقيت منتظرة خبر موتي”خبر خطوبة سفيان” كان بالنسبةِ ليا الموت..الموت وبس

“الحمد لله الذي بنعمته تتم الصالحات..النهاردة كانت قراءة فاتحة حب عمري..بحبها بقالي خمس سنين وأخيرًا أتخطبنا”

البوست نزل عليا زي الصاعقة..أخدته كوبي وبعته لفريدة رغم اننا مبنتكلمش من يوم الي حصل بس أنا مليش غيرها والي يحصل يحصل…شافت الرسالة ومردتش فضلت أعيط وبعد ربع ساعة كانت عندي في البيت

-بطلي عياط يا ورد كفاية
-أنا كنت عارفة إنه هيخطب بس أنا كنت عايزاه يقولي لا.. أنا الي بحبه يا فريدة..أنا بكرهه ليه محسش بيا ليه
-اهدي طيب هو لو كان نصيبك مكنش خطب غيرك خلاص أهدي بقي
-إزاي كان بيحبها من خمس سنين وكان بيبص عليا! إزاي كان بيمشي يبص علي دي ودي ويهزر مع دي ودي..دا أنا كنت بغير! وهي معندهاش دم
-ياستي خلاص بقي بطلي عياط يا ورد ميستهلش
-إحضنيني يا فريده مش قادرة حسه قلبي هيقف
-بعد الشر عنك يا قلبي..أهدي انا هبات معاكي النهارده
-هو بجد مبيحبنيش؟!
-لا يا ورد..لازم تبقي قوية انتي مش ضعيفة مش الحب الي هيهزمك يا ورد انتي أقوي من كدا
-الحب دا ضعف..الحب بيموت..الحب حلو من بعيد بنفضل نرسم في أحلامنا ونتخيل حياتنا في الحب..وبنصحي وأحنا مصدومين من الواقع..الحب حلو بس في الروايات والأفلام
-بكرة يجيلك الي يحبك بجد يا ورد
-تفتكري!
-إنتي حبيتي آه بس من طرف واحد وأنا متاكده ان بعد شوية وقت هتقوليلي إنك محبتيهوش اصلًا..سفيان مغلطش حتي ياورد هو مكلمكيش ولا عشمك بحاجة إنتي الي كنتي بتوهمي نفسك بالحب دا
-الحب حلو بس من بعيد

“عملتله بلوك من كل حته كنت بتاعه بطلت أروح مكان شغلة غيرت الباص الي كنا بنروح فيه سوا غيرت الساكاشن..خايفة يشوفني أنا قدام نفسي صغيرة أوي..مش هقول بطلت أحبه بس عالأقل..قدرت أسيطر علي نفسي..عرفت أبعد..كملت حياتي بدأت فعلا أحس أنه مكنش حب الي مفروض أشوفه وبدأت أعيش حياتي…بعيد عن الكام ساعة عياط كل يوم بليل”

-ورد؟
-سفيان؟!..نعم
-عملتيلي بلوك ليه من كل مكان
-علشان انت عارف إن مبكلمش ولاد
-أمال كلمتيني ليه؟
-غلطة وبعتذر إني كلمتك بس الحمد لله صلحت الغلطة
-فرحي بكرة هتيجي؟
-آه أكيد المكان فين؟
-في المحل الي انا كنت بشتغل فيه تقريبا حبيبك شغال هناك كنت بشوفك هناك اكتر من بيتكم
“يعني كنت بتشوفني هناك وماخدتش بالك اني باجي علشانك
-لا حبيب اي بقي مليش في الحاجات دي..أنا بحب المكان بس
-آه..هستناكي متتأخريش فرحي على حب عمري بكرة ولازم الناس كلها تشهد وتشوفه
-ألف مبروك.

“مشيت من قدامه في فيمتو ثانية كانت لحظة ودموعي هتنزل قدامة..مشيت ودعيتله..دعيتله إن ربنا يفرحهم..ويبعتلي الي يحبني علشان أنا غاليه وأستاهل أتحب”

“لن نقدر يومًا علي التحكم بقلوب الآخرين..الحب هو من يختار القلب الذي نُغرم بِه”

اظهر المزيد

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً

إغلاق
زر الذهاب إلى الأعلى
الرجوع الى الصفحه الرئيسة
إغلاق

أنت تستخدم إضافة Adblock

برجاء دعمنا عن طريق تعطيل إضافة Adblock