نقد فني
أخر الأخبار

فيلم “الحب الاول” لمصطفي قمر وإحيائه لنوع من الافلام النادرة …

فيلم (الحب الاول)انتاج سنة١٩٩٩
بطولة (مصطفى قمر)،(منى ذكي)،(حنان ترك)،(هاني رمزي)،(طارق لطفى)،(مريم فخر الدين)
الفيلم معظمنا عارفين ايه حكايته بأن بيحكي عن خالد الفقير اللي بيشتغل مغني ملهى ليلي و بيحب رانيا اللي بيكتشف بعد كدة انها مرتبطة بأحد أصدقائه الأثرياء وهو هشام وبتحبه بنت عم رانيا وفاء اللي كانت جاية من الصعيد عشان تدرس في القاهرة في نفس الوقت اللي بيحبها فيه صاحبهم التالت وهو حسن وبتتوالى الأحداث مابين الكوميديا والرومانسية والغناء والاستعراض إلا أن بتكتشف وفاء الحقيقة الخبيثة لهشام وتعرف أن خالد بيحبها ويرتبطوا ببعض في المشهد الاخير وهم في المطار

الفيلم قصته وشخصياته فيها شبه كبير من افلام عبد الحليم حافظ أو افلام فترة الخمسينيات والسيتينات
مثلا هنلاقي مصطفى قمر واخد الدور اللي كان دائما بيلعبه عبدالحليم حافظ وهو الشخص الرومانسي الحالم الموهوب وساعات كتير بيبقى الفقير اللي بيحب حبيبته من اول نظره وبينجرح منها
مني ذكي بتمثل البطلة الڤيديت اللي بتكون محبوبة و عليها العيون وجميلة وفي نفس الوقت برضو مخدوعة
طارق لطفي بيمثل شخصية احمد رمزي واللي كان بيطلع كتير مع عبد الحليم حافظ في أفلامه وواخد دور الچان البنات بتحبة وفاتح قميصه وصدره على البنات قصدي على الدنيا

هاني رمزي دامج بين شخصيتين كانوا على طول بردو بيطلعوا مصاحبين لعبد الحليم وبيبقوا الاقرب ليه وهم عبدالمنعم ابراهيم وعبدالسلام النابلسي وبردو بيطلعوا حظهم في الحب مش قد كدة
وحنان ترك وهي بتمثل شخصية ماجدة في فيلم بنات اليوم الهادئة الراسية اللي بتيجي على نفسها عشان خاطر اقرب ناس ليها وهكذا

القصة بردو بترصد مشاكل الشباب في الوقت دة مع المجتمع واهاليهم نفس الجزء اللي كان بياخدوا افلام كتير زي (ايامنا الحلوة)(بنات اليوم)(البنات والصيف )وغيره
حتى الازياء كانت كلاسيكية بترجعنا شوية لفترة الرقي والهدوء في كل حاجه حتى تسريحات الشعر واعتماد في لبس الرجالة على البدل اكتر من الكاچول

_الاغاني اللي غناها مصطفى قمر كانت معظمها هادئة وفيها المازيكا الشرقي اللي كان بيسلكها عبد الحليم في تشابه كبير جدا بين اغاني الفيلم دة زي (عارف ليه)و(خايف) ومابين اغاني زي (ياقلبي خبي )و(هي دي هي)
الإضاءة كمان كانت خافتة وهادئة ومايلة للنغبشة اللي بتبقى عادة في الأفلام القديمة مع أن الفيلم انتاج (١٩٩٩)
هو فيلم عبارة عن احياء لنوع من الافلام مابقاش موجود وياريته يرجع تاني.

اظهر المزيد

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
الرجوع الى الصفحه الرئيسة
إغلاق

أنت تستخدم إضافة Adblock

برجاء دعمنا عن طريق تعطيل إضافة Adblock