صحةمقالات
أخر الأخبار

حقائق مهمة عن الفسيخ

مش هنقول بقى ان الفسيخ سمك معفن و الكلام ده لاننا كلنا سمعنا الكلام ده قبل كده و عارفينه بس في حاجات مهمة لازم تعرفها هتغير تفكيرك عن الموضوع

  • الاسماك النيئة عموما بتحتوي بشكل طبيعي على ميكروبات كتير منها ميكروب Clostridium botulinum المسبب للتسمم الشهير (التسمم البتيوليني)
    و بالتالي الفسيخ لو اتعمل في البيت او في الشارع او عند ماما او عند فلان او في انظف مكان في العالم ، الميكروب المسبب للتسمم وارد يكون موجود لانه عشان يموت لازم نعمل معاملة تعقيم بالحرارة على 121 درجة مئوية و طبعا محدش هيعقم السمك على الحرارة دي قبل ما يعمله فسيخ فالموضوع ملوش علاقة بأنه معمول في البيت او الشارع او غيره (فسيخ البيت ميجبش تسمم دي خرافة)
  • طيب ازاي و احنا بناكل سمك على طول و مبيحصلناش حاجة، الفرق الرئيسي هنا ان الفسيخ من الاكلات القليلة اللي بيتم عملها في ظروف لاهوائية، يعني ببساطة بيتمنع عنه الهواء في فترة التخمير و الميكروب عشان ينمو و يفرز السم لازم يكون في غياب الهواء
  • خلال فترة التخمير دي المفروض اللي بيحصل أن الملح يوصل لكل الأنسجة و الملح من العوامل اللي بتوقف الميكروب فعلا لكن لازم يكون نسبة الملح 8% او اكتر عشان يوقف نشاط الميكروب و وارد ان نسبة الملح متوصلش لكده في كل الانسجة خصوصا لو كانت السمكة كبيرة في الحجم
  • بعد عملية التفسيخ او التخمير لو كان السمك يتحتوي على السم فمفيش اي طريقة بتشيل السم لاننا مش هنقدر نعامل الفسيخ بالحرارة و كمان اضافة الليمون او الحموضة مش هتقضي على السم لانه بيقاوم كل الكلام ده
  • المنطقة اللي بيفرز فيها الميكروب السم بتكون محدودة جدا يعني ممكن جدا اتنين ياكلو من نفس السمكة و حد يكون سليم و التاني يتسمم
  • مهم جدا نفهم اننا لما نتعامل مع الميكروبات المفرزة للسموم لازم نفرق كويس جدا بين الميكروب نفسه و السم اللي بيفرزه لان مثلا لو الحموضة بتوقف نمو الميكروب نفسه لكنها مش هتدمر السم .
  • تكلفة جرعة العلاج من السم غالية جدا و بتكلف اكتر من 90 الف جنيه في المصل و اللقاح و ممكن تكون وصلت اكتر كمان
  • عشان تعرف مدى خطورة السم ده لازم تعرف ان حوالي 1 جرام من السم يكفي لقتل مليون انسان و بالتالي يعتبر من اخطر المواد اللي ممكن البشر يتعامل معاها
  • خطورة الميكروب و الاهتمام الكبيرة بيها ممكن تتوضحلنا من اننا نعرف ان الاغذية في العالم كله بتتقسم بحموضتها الى (اغذية حامضية و غير حامضية) يعني (مش قلوية و حامضية و معتدلة زي المحاليل العادية) و التقسيمة دي اتعملت بناءا على ميكروب الكوليستريديم لان الميكروب بيوقف نموه على درجة pH 4.5 او اقل و بالتالي العلماء قالوا ان الاغذية اللي pH بتاعها اعلى من 4.5 هنسميها اغذية غير حامضية و الاغذية دي لازم ناخد بالنا منها و احنا بنصنعها و بالتحديد لو تم تصنيعها او حفظها في ظروف لا هوائية زي المعلبات و هيكون ليها درجة تعقيم محددة
  • كمان مصنعات اللحوم زي اللانشون و غيره , اغلب المصنعات دي يتضفلها مادة بتديها لون احمر اسمها النيتريت و النترات المادة دي مش بس مسؤولة عن اللون لكن دورها الاساسي هو انها توقف نمو ميكروب الكوليسترديم بالتحديد و بالرغم من الكلام الكتير عن النيتريت و اضرارها و انه مادة مسرطنة ما زال العالم بيستخدمه عشان يحموا المستهلك من التسمم اللي اثره هيكون اخطر
  • التسمم ليه اعراض كتير زي الدوخة و الصداع وصعوبة في الكلام والبلع لكن العرض الرئيسي اللي بيعرفني اذا كنت اصبت بتسسم بتيويوليني او لا هو الروؤية المضاعفة (يعني اشوف الحاجة اتنين) و للاسف العرض ده لو ظهر ده معناها اننا وصلنا لمرحلة متاخرة من التسمم اللي بدا فيها السم يعمل شلل للاعصاب و العضلات اللارادية و اللي منها القلب و الرئة و حتى العلاج بالمصل مش هيعمل حاجة
  • ناس كتير طبعا بتاكل و مبيحصلهاش حاجة و ده لان اننا هنا بنتعامل مع الصدفة حرفيا ، ممكن 100مرة تخيب و مرة تصيب ، طيب ليه اخد الخطر ده على حساب صحتي , مش معنا ان ربنا سترها معاك في كل المرات اللي فاتت فده هيحصل دايما

….دمتم سالمين

اظهر المزيد

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق
إغلاق