رياضة
أخر الأخبار

حسام حسن .. العميد

مفيش شك ومحدش ينكر إن الكابتن “حسام حسن” رغم الخلافات اللى دخل فيها مع أغلب مشجعي أهم الأندية المصرية والشد والجذب اللى بيكون بينه وبينهم من وقت للتاني بس بالأرقام هو من أهم اللعيبة اللى جت فى تاريخ مصر..

“حسام” هو هداف مصر الأول على مدار التاريخ برصيد 83 هدف دولى.. الهداف التاريخى للنادى الأهلى برصيد 143 هدف.. أفضل لاعب فى القارة الأفريقية فى أخر 50 سنة.. اللاعب الوحيد اللى حصل على 11 بطولة فى 4 سنين بس مع نادى الزمالك من سنة 2000 لـ 2004..

قبل صعودنا لكأس العالم فى روسيا 2018 كان كابتن “مجدى عبدالغني” زهقنا من الجون بتاعه اللى دخله فى كاس العالم 1990 بس مش كتير يعرفوا إن “حسام” كان هو صاحب هدف صعود مصر لكأس العالم أصلاً!..

“حسام” برضه أكتر لاعب فى العالم حصل على بطولات مع الأندية ومنتخب بلاده برصيد 41 بطولة قبل ما يكسر رقمه ده السنة اللى فاتت اللاعب البرازيلى “داني ألفيس” اللى أخد بطولة الدورس الفرنسي مع باريس سان جيرمان وبعدها بطولة الكوبا أمريكا مع منتخب البرازيل عشان يوصل رصيد بطولاته لـ 43 ويكسر رقم “حسام” اللى يرجع للمركز التانى ولكنها برضه مكانة مش قليلة!..

إختارته شبكة “يوروسبورت” باللغة الفرنسية، عشان يكون اللاعب المصرى الوحيد في قائمة أفضل 20 لاعب في تاريخ الكرة الأفريقية.. هو كمان الاعب الوحيد في تاريخ كرة القدم اللى لعب بطولتين بفاصل 20 سنة من سنة 1986 لغاية 2006.. هداف تاريخ لقاءات الأهلى و الزمالك برصيد 9 أهداف منها 5 للأهلى فى الزمالك و 4 للزمالك فى الأهلى.. اللاعب العربى و الافريقى الوحيد اللى سجل سوبر هاتريك فى كأس الإتحاد الاوروبى لما سجل 4 أهداف لنيوشاتل السويسرى فى مرمى سيلتيك الإسكتلندى العريق.. أكبر لاعب يسجل فى تاريخ كأس أفريقيا لما عمره 40 سنة وده لما سجل هدف فى مرمى الكونغو الديموقراطية فى كأس الأمم الأفريقية سنة 2006..

على مستوى التدريب “حسام” خاض التجربة كذا مرة لكنه للأسف لم يتوج بأى بطولة..

“حسام” حسن” بيقدر يزرع فى أى لاعب بيلعب تحت إدارته الفنية الحماس والرغبة فى تحقيق نتيجة إيجابية.. نتمني إنه يكمل فى مسيرته التدريبية بمعايير مختلفة أهمها إنه يفتكر دايماً تاريخه العظيم والمشرف واللى بنتباهى بيه، واللى يخليه يترفع عن صغائر كتير ممكن يقع فيها عشان يبقى عندنا مدرب عظيم مش ناقصه بس غير الحتة دى وإسمه “حسام حسن”.

اظهر المزيد

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق
إغلاق